Entrugues frecuentes

Sidra d’Asturies

¿Cuáles son les característiques propies de la Denominación d’Orixe “Sidra d’Asturies”?

  • Los sos oxetivos principales tán empobinaos a mirar pola calidá del productu y a defender tola sidra que, si tien les característiques definíes nel so Reglamentu, cumpliera na so producción —collecha, ellaboración y corcháu— tolos requisitos que s’esixen nel mesmu.
  • La zona de producción de la sidra acoyío pola Denominación d’Orixe “Sidra d’Asturies” ta formada poles tierres que tán en toos y caún de los Conceyos qu’igüen l’ámbitu territorial del Principáu d’Asturies.
  • La ellaboración de la sidra acoyío tien que se facer con mazana de les races comprendíes dientro d’estos bloques teunolóxicos: Ácido: Durona de Tresali, Blanquina, de Llimón Montés, Teórica, San Roqueña, de Raxao, Xuanina y Fuentes; Dulce: Verdialona y Ernestina; Ácido-amargo: Regona; Amargo: Clara; Amargo-Semiácido: Meana; Dulce-amargo: Coloradona; Semiácido: de Carrió, Solarina, de la Riega, de Collaos, Perico, de Prieta y Perezosa; Semiácido-amargo: Panquerina. Amás tamién se contempla un 49% de races tradicionales de mazana de sidra. Queden prohibíes estes variedaes de mesa: Raneta B. Canadá, R. G. Canadá - Raneta Francia, Esperiega, Raneta Canadá - Pumarón - de Garciasol - Francesa - Chapa, Raneta de Panera, Golden Delicious - Infiestón, Mingán, Chata Encarnada, N. de Cox - Tartilla - Villaviciosa, Florina - Querina, Carapanón - R. Rosada, Granny Smith, Macintosh - Rosalisa.
  • La defensa de la Denominación d’Orixe ta encomendada al Conseyu Regulador de la Denominación d’Orixe “Sidra d’Asturies”.

¿Cuáles son les ventayes de la Denominación d’Orixe?

  • Ufierta una marcación estricta y llegal de defensa y proteición del productu contra’l fraude.
  • Fomenta y favorez la organización del sector productivu.
  • Ameyora l’espardimientu, promoción y ufierta del productu protexíu a nivel rexonal, nacional y internacional.
  • Facilita l’accesu de los productores a mercaos nacionales y internacionales.

¿Cuálos son los derechos y obligaciones de los inscritos?

Derechos de los inscritos

Namás los inscritos en Rexistru d’Operadores van poder producir mazana pa facer sidra protexío, tresformar esa mazana y sacar sidra que puea certificase como Denominación d’Orixe Protexida “Sidra d’Asturies” y corchase al abellugu d’esa denominación.

La Denominación d’Orixe Protexida “Sidra d’Asturies” namás se pue aplicar a la sidra que venga de pumaraes y llagares inscritos nel correspondiente Rexistru d’Operadores, que se fixera y corchara acordies coles normes esixíes pol Reglamentu de la Denominación y que tenga les condiciones físico-químiques y organoléptiques establecíes.

El derechu a usar la Denominación d’Orixe Protexida en documentación, etiquetes, publicidá o propaganda, ye esclusivu de les firmes que, desque inscrites y rexistraes en Conseyu Regulador, llograren la certificación del productu.

Obligaciones de los inscritos

Los inscritos queden obligaos a cumplir les disposiciones del Reglamentu y otros documentos internos del Conseyu Regulador, ensin prexuiciu de lo qu’afiten les normes llegales vixentes, amás d’a pagar les tases que-yos correspuenda.

Los inscritos tienen que tener actualizada la inscripción en Rexistru y tar al corriente nel pagu de les sos obligaciones col Conseyu. El Conseyu Regulador va garantizar la confidencialidá de tolos datos sacaos de les persones rexistraes.

Col envís de poder acreitar l’orixe y calidá de la sidra, los titulares de les pumaraes y llagares tán obligaos a cumplir estos requisitos:

  • Les persones que tengan inscrites les pumaraes o llagares namás puen tener almacenao la mazana, sidra dulce y sidra nos terrenos o locales declaraos en Rexistru, y si nun ye asina pierden el derechu a la Denominación d’Orixe.
  • Tolos titulares de les pumaraes y llagares tienen que declarar al Conseyu Regulador esto:
  1. Les firmes inscrites en Rexistru d’Operadores “pumaraes” tienen que presentar, desque acabe la collecha, declaración de lo que se coyó en caúna de les pumaraes inscrites, indicando’l so destín.
  2. Les firmes inscrites en Rexistru d’Operadores “Llagares” tienen que declarar el volume de la sidra que fixeron y tienen que señalar la procedencia de la mazana y el destín de la sidra que vienda.
  • Les marques, símbolos, emblemes, lleendes publicitaries o cualquier otra mena de propaganda que s’use na sidra acoyío pola Denominación d’Orixe nun va poder usase de nenguna manera, nin siquier polos mesmos titulares, na comercialización d’otra sidra non protexío o de bebida derivao de la mazana.

¿Cómo s’integrar na Denominación d’Orixe?

  • Pente medies de la inscripción en Rexistru d’Operadores

Los pidimientos d’inscripción en Rexistru d’Operadores de “Pumaraes” y “Llagares” tienen que se dirixir al Conseyu Regulador.

¿Quién pue inscribise?

En Rexistru d’Operadores “Pumaraes” puen inscribise los titulares de les plantaciones que tean na zona de producción y que s’axusten a lo afitao en Reglamentu de la Denominación d’Orixe y que la so mazana puea destinase pa facer sidra protexío.

El Conseyu Regulador va da-yos a los amos de les pumaraes inscrites una credencial d’esa inscripción.

La cuota d’inscripción pa les pumaraes ye de 30 euros por titular. Asina mesmo va ponese una cuota añal cada campaña.

En Rexistru d’Operadores “Llagares” puen inscribise los titulares de les instalaciones d’ellaboración de sidra asitiaes na zona de producción que’l Conseyu Regulador compruebe que son afayadices pa facer sidra y que puean acoyese a la Denominación d’Orixe Protexida. La cuota d’inscripción pa los llagares ye de 150 euros por titular. Asina mesmo tienen que se pagar les cuotes añales cada campaña.

La inscripción en Rexistru d’Operadores nun quier dicir que los interesaos nun tengan la obligación d’inscribise nos Rexistros que tean establecíos, como’l Rexistru d’Industries Agraries y el d’Envasadores y Embotelladores. Esto hai que lo acreitar primero d’inscribise nos Rexistros del Conseyu Regulador.

  • ¿Cuáles son les condiciones d’inscripción?

Voluntariedá de la inscripción

La inscripción nos Rexistros d’Operadores ye voluntaria, igual que la baxa correspondiente. Desque se dea la baxa, tien que pasar a lo menos un añu pa poder volver facer otra inscripción, nun siendo cambeos de titularidá. Les entidaes rexistraes tamién puen dase de baxa por sanción del Conseyu Regulador y nun puen volver pidir l’alta primero de que pasen dos años.

Pa poder algamar la certificación de la sidra con Denominación d’Orixe Protexida fai falta inscribise en Rexistru.

Vixencia de la inscripción

Pa la vixencia de la inscripción en Rexistru d’Operadores ye obligao cumplir en tou momentu colos requisitos qu’impón el Reglamentu de la Denominación y hai que comunicar al Conseyu Regulador cualquier cambéu qu’afecte a los datos daos na inscripción cuando ésti se produza. En resultancia, el Conseyu Regulador pue suspender o anular les inscripciones cuando los sos titulares nun s’atengan a eses disposiciones. El Conceyu Regulador va facer inspeiciones periódiques pa comprobar la efectividá de tolo dicho enantes.

Nun aclarié les mios duldes. ¿Cómo puedo facer una entruga al Conseyu?

Si nun tuvo una respuesta bona pa les sos duldes nesta sección d’Entrugues frecuentes, pue facenos la so entruga al traviés d’esti formulariu.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.OK