Hestoria de la manzana

Hestoria de Asturias

Bona parte de los estudiosos daten l’antigüedá de la mazana en dómines prehistóriques, calteniendo, mesmamente, que la plantación de la mazanal hai que la poner nel orixe de cualquier civilización. Dellos historiadores ponen el so aniciu en China; otros pónenlu na rodiada del Mar Negru, n’Asia Menor; y nun falten los qu’afiten l’aniciu claru d’esta fruta.

Adan y Eva

Adan y EvaPue pensase en favor del aniciu oriental de la mazana na tradición cristiana tan llamativa qu’asocia esta fruta col primer pecáu d’Adán y Eva. Paez que se demostró en trabayos anteriores l’aniciu d’esta tradición, nacida non enantes del sieglu IX y espardida per Europa a partir del sieglu XV.

Los restos más vieyos de mazana, según Herr, correspuenden a la dómina más recién de la Edá de Piedra, ente 8.000 y 2.500 enantes de Cristu; y, n’opinión d’Engel, yá apaecen variedaes llabraes de mazana nel periodu de Hallstatt, correspondiente a la primer dómina de la Edá de Fierro.

Los llatinos llamaben malum a la mazana y malum matianum a una raza de la mesma dedicada a Macio, escritor culinariu, tratadista d’Agricultura y amigu de César. Apicio, nomáu gastrónomu romanu de la dómina de Tiberio, bríndanos delles recetes de mazanes na so prestosa obra De Re Coquinaria y Anthimus, médicu del sieglu VI, caltién na so Epistola De Observatione Ciborum que les mazanes y peres, igual qu’otres frutes, namás pinten bien cuando madurecen al sol.

¿Cuándo llegó la mazana a Asturies? Nun hai respuesta bona a esti problema. Sabemos que yá se llabraba y s’apreciaba como fonte de riqueza en sieglu VIII, acordies col documentu de fecha 25 de payares del añu 781, robláu polos padres benitos Fromestano, Máximo y los sos monxos, fundadores del Monesteriu de San Vicente d’Uviéu. Otru documentu bien interesante ye’l testamentu de Fakilo, que data del añu 793 ó 803, y que narra cómo’l testador fai donación de la quinta parte de la so facienda en favor del Monesteriu de Santa María de Lliberdón (Colunga).

De Re Coquinaria d’Apicio

De Re Coquinaria d’ApicioQuiciabes la cultura árabe, arreyada a la historia española dende’l sieglu VIII y manifestada con tol so esplendor hasta’l sieglu XIII, tuviera tamién muncho que ver col espardimientu de la llabranza de la mazanal nes nueses tierres, sofitándose sobre manera nel calter melecinable de la so fruta.

Dende’l sieglu XII esistíen n’Asturies los llamaos contratos de mampostería o mampostura, fórmula xurídica qu’obligaba a terratenientes y colonos, polos que l’amu d’una tierra facía a otru un contratu pa que la llabrara y plantara de mazanales. D’esta manera, según documentos guardaos n’Archivu de San Pelayo d’Uviéu, les monxes de San Bartuelu de Nava enllenaron de pumaraes les sos munches tierres de Villaviciosa y Colunga.

Dende’l sieglu XVI y XVII yá s’espardió la plantación de mazanales, y yá en sieglu XIX y posteriores foi parte fundamental de la economía asturiana.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.OK