Ellaboración de la Sidra

PROCESU D'ELLABORACIÓN

La mazana entama a pañase, aproximao, na segunda quincena d’ochobre; anque, lóxicamente, esto va depender del grau de madurez de les races de mazana, qu’al empar ta condicionáu pola meteoroloxía de cada añu. Ye entós cuando escomienza a pañase la mazana, procesu qu’enta güei se fai cuasi dafechu manual.

En cuantes que se recibe na báscula la mazana, yá se fai'l primer analís visual d’ello (1), refugando lo que tea malo por maduración, falta de llimpieza, etc...). Darréu, llávense les mazanes con dellos puntos d’agua a presión (2) pa quitar tola suciedá apegada a elles.

Depués pasen per una escoyedora (3) onde los operarios quiten aquelles mazanes que nun s’atopen nes meyores condiciones. Finalmente na mayadora faise’l mayáu propiamente dichu. Esti mayáu faise modernamente con un molín eléctricu, al que la fruta ha llegar llimpio y nes meyores condiciones.

Ye importante escoyer bien (3) acordies coles races, la so maduración, la graduometría de la magaya o buruyu (mazana yá mayao), pa que nun sía demasiao pequeña, quitando asina de que la sidra dulce salga del llagar; o que sía demasiao grande, quedando entós cachos de mazana ensin mayar.

De la mayadora (4) la mazana pasa directo pa les prenses (6) o llagares (5). Nesi momentu, la sidra dulce entama a posar na base del llagar, pasando a los duernos que tan ehí pa esi fin. Les prenses que s’usen pueden ser prenses de madera o prenses hidráuliques d’aceru inoxidable.

En cuantes que ta enllenu cada llagar con mazana mayao, y depués d’unes hores en reposu, entama’l “cortáu del llagar”, que se fai abriendo una canal a lo llargo del perímetru del llagar, faciendo asina más fácil que salga la sidra dulce. La magaya cortao ponse otra vuelta sobre lo otro pa prensalo otra vuelta. Depués de tres o cuatro díes, nos que se repite esti procesu, la magaya sacao de la prensa ta yá estrucío dafechu.

En cuantes que ta sacao la sidra dulce, bombiase pa les pipes o toneles de castañu o tinos d’aceru inoxidable, onde ta yá preparao pa formentar.

Nel procesu de formientu la sidra dulce, pola mor de l’aición del lleldu, xunto coles bacteries del entornu, va tresformándose en sidra con col desprendimientu del anhídridu carbónicu. Na formentación alcohólica, los azucres, fructosa, etc., son tresformaos en munchos de los sos componentes, ente los que rescamplen como productos mayoritarios l’eltanol y el CO2.

El formientu dase a una temperatura controlada, hasta que nos menguantes de xineru y febreru se faen los trasiegos rotativos pa quitar les borres y igualar la sidra. Esti procesu suel algamar los meses d’Abril o Mayu. Periódicamente son controlaos, ente otros procesos, la concentración d’azucres, l’ácidu málicu y otros parámetros cola fin de conocer la evolución de la formentación.

Diagrames del procesu d’ellaboración

Proceso Parte 1

Proceso Parte 2

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.OK