Preba de la sidra

Sidra DOP

Hai muncha diferencia ente prebar y beber. Beber ye namás inxerir un líquidu pa quitar la sede o esfrutar con gustu. Prebar ye conocer lo meyor posible’l productu que bebemos, sometiéndolu al xuiciu de los nuestros sentíos, pa determinar les sos característiques. Ye un actu intelectual, posáu y reflexivu, y pola mor d’ello requier ciertu grau d’aprendizaxe.

La preba ye al empar una técnica y un arte. Ye una técnica porque tien una metodoloxía que ye mester aprender y los sos resultaos esprésense usando un llinguax afayadizu y especializáu. Arte, porque nun ye una ciencia exacta, y cada prebador emplega los sos sentíos d’un mou únicu y personal. Por eso, pa esfrutar d’una sidra, pa tastiala de verdá, ye mester tener unos conocimientos básicos del arte de la preba, de la cultura de la sidra: observala na copa o en vasu, golela, distribuyila peles partes sensibles de la boca pa tantiala y dar un xuiciu sobre’l so palu y la so calidá.

Pide echar los cinco sentíos

La preba pide los cinco sentíos, porque tanto la vista como l’oyíu, l’olfatu, el tactu y sobre manera’l gustu, son necesarios pa facer una buena preba. Les sensaciones y la nuestra perceición faen rescamplar el papel xugáu pol sistema nerviosu y sobre manera’l celebru na composición d’elles. El celebru ta dotáu de memoria, ensin la que la preba nun ye posible.

Analís Sensorial

La memoria pue ser: visual, olfativa y gustativa.

Nel aspectu visual, ha observase sobre manera’l color, si hai o non desprendimientu de gas carbónicu, llimpieza, brillu, etc.

Del olfatu interesa la intensidá, la calidá y el calter de los arumes.

Na boca ha atendese pa los cuatro sabores básicos: dulce, saláu, amargu, acedu, y la interrellación ente ellos.

Esti sistema d’analís pue valir -con pocos cambeos- lo mesmo pa la sidra d’espresión nueva como pa lo achampanao. La preba de sidra tradicional ye estremada de les otres y non solo pola serviciu en vasu.

Preba de sidra d’echáu tradicional

A la de prebar una sidra acabante d’echar, han tenese en cuenta una riestra d’aspectos típicos. Visualmente ha mirase l’ESPALME, que ye’l comportamientu de la espluma superficial que sal al echar la sidra; ésta ha desapaecer darréu y dafechu, nun dexando cercu nin espluma. Tamién ha tenese en cuenta l’AGUANTE o GRANU, que son les burbuyines de gas que queden ente la sidra y que siguen ehí mesmamente depués d’espalmar, y que van desapaeciendo amodo. Un aguante afayadizu pide una persistencia de les burbuyines más o menos llarga. P’acabar hai que mirar el PEGUE o la espluma que queda apegao nes paredes del vasu en forma de burbuyines y de mou consistente, anque esti parámetru nun se tien por fundamental nes sidres abellugaes baxo la denominación d’orixe.

Na ñariz ye importante alcordase de qu’esta sidra suel tener una acidez volátil más alta.

Na boca tien un tastu ácidu característicu, acompañáu d’amargor y d’una astrinxencia suave, teniéndose por positiva una sensación de dél dulzor qu’equilibre’l conxuntu. Poro, ye un productu secu, ensin azucres residuales.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.OK