Echalo

COMO SE DEBE ECHAR LA SIDRA

Echar ye dexar cayer la sidra de la botella al vasu. El so orixe vien de la espicha, onde la sidra cai dende la pipa al vasu o la xarra. Asina llógrase’l mesmu efectu que dende’l tonel. Siguiendo esti ritual búscase resaltar les cualidaes de la sidra, espertar el carbonu endóxeno y volatilizar parte del ácidu acético que tien la sidra.

Les midíes del vasu, 12 centímetros d’altu, 9 de boca y 7 de culu, faen que la evaporación seya mayor y que nos llegue meyor el so golor ayudao poles burbuyes d’anhídridu carbónico y aire formaes al pegar la sidra contra les paredes del vasu.

Audio del video en castellano

El decálogu pa echar sidra diznos que la postura tien que ser derecha ensin ser ríxida; el brazu que tien pela botella tien que tar espurríu perriba la cabeza. El brazu que garra’l vasu tien que tar espurríu p’abaxo y nel centru del cuerpu. La botella, desque s’entorna pa echar el culete, tien que tar bien garrada colos deos índiz, corazón y anular pel so cuerpu y col moñín pel culu; los deos que garren la botella nun la tienen que pasar contra’l bocal.

El vasu gárrase colos deos índiz y gordu, mientres que’l deu corazón se pon en culu, y l’anular y el moñín queden encoyíos na mano; el vasu nun se pue mover del centru del cuerpu, lo que quier dicir que ye’l chorru de sidra’l que tien que buscar el vasu; el corchu pue garrase colos deos anular y moñín de la mano que tien pel vasu; al apurrir el culete, si se quita del vasu’l deu pulgar queda más bono de garrar pal veceru; l’echador tien que mirar siempre que la sidra espalme.

El gas que la sidra produz desque s’echa llámase estrella. El pegue o granu ye la capacidá de la sidra p’apegase a la parede del vasu desque se bebió. P’acabar, llámase aguante a les burbuyines que siguen na sidra depués d’espalmar. Estes son les característiques propies de la sidra de calidá.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.OK