Controles sobre la calidá

El Conseyu Regulador ye l’organismu encargáu de garantizar la calidá de tola sidra acoyío baxo la marca «Sidra d’Asturies». Pa ello tien afitáu un procedimientu de verificación de l’aptitú del productu per aciu de la realización d’análisis físico-químicos y organolépticos. El Conseyu Regulador encarga la realización de los análisis físico-químicos químicos al SERIDA, llaboratoriu asturianu acreitáu por ENAC baxo la norma UNE-EN ISO/IEC 17025:2017. Los análisis organolépticos failos el Conseyu Regulador al traviés del so Panel de Preba, organismu con un rigor y profesionalidá que ye clave nel sistema de garantíes que la DOP «Sidra d’Asturies» ufierta a los consumidores.

La toma de muestres fáenla los auditores de la Estaya de Certificación del Conseyu Regulador. Utilizamos un sistema de codificación doble: nel momentu de la toma de muestres asígnase un códigu a caúna, que dempués camudamos por otru enantes d’apurriles al responsable del Panel de Preba. D’esti mou garantízase que los prebadores nunca puedan saber l’orixe de les muestres que tán evaluando. Amás introducimos nes prebes muestres «falses», dacuando con dalgún defeutu, que nos sirven pa controlar de siguío’l llabor correutu de los nuesos prebadores.

La nuesa sala de prebes, como ye lóxico, ye un llugar con ausencia de ruíos y golores, intimidá y ambiente controláu, cola lluz y la temperatura afayadizo y constante preba tres preba. Cada prebador tien la so propia cabina, caúna d’elles idéntica a les demás, dixebraes ente sí, cola so propia lluz uniforme y difuso, y con asientos cómodos y d’altor regulable. Toes estes especificaciones recuéyense na norma UNE-87-004-79 y tomámoslo bien en serio, porque una sala de prebes profesional ye l’únicu llugar au puede trabayar un Comité de Preba profesional si quier ufiertar resultaos correutos y nos que s’enfotar, claves pa un control de calidá acionáu. Dicho d’otra miente: si una preba nun tien llugar nuna sala de prebes, entós nun ye más qu’una xera divulgativa o promocional, con valor nulu como garante de la calidá d’un productu.

Controles en llaboratoriu
Controles en llaboratoriu

El nuesu Comité de Preba axúntase dos vegaes al mes. Una de les claves d’una evaluación correuta de la calidá ye l’anonimatu de los prebadores, que ye la meyor manera d’asegurar que’l so trabayu tea llibre de presiones y seya oxetivu ya imparcial. Nin los prebadores saben de quién son les muestres, nin los llagares saben la composición del Panel de Preba que-yos evalúa: esa información namái ta en poder de la Estaya de Certificación del Conseyu Regulador.

Los integrantes del Panel de Preba son profesionales venceyaos al mundu de la sidra con amplia esperiencia y con formación en prebes de sidra, principalmente sumilleres, enólogos, hosteleros y llagareros. Los miembros del nuesu Comité de Preba dediquen de forma anónima y desinteresada el so tiempu y la so conocencia a garantizar que namái la meyor sidra pueda llucir la marca «SIDRA D’ASTURIES».

Los parámetros de calidá evaluaos pol Conseyu Regulador son públicos y vienen recoyíos nel apartáu B.3 del Pliegu de Condiciones de la DOP «Sidra d’Asturies». Les carauterístiques físico-químiques son más restrictives que les que tien de cumplir la sidra ensin denominación d’orixe, y verifícase’l so cumplimientu nel llaboratoriu del SERIDA, que ta acreitáu pol ENAC baxo la norma UNE-EN ISO/IEC 17025. Les carauterístiques organoléptiques (arume, tastu, color, aspeutu y atributos de gas) especificaes nel Pliegu son les que dan a la nuesa sidra la so tipicidá y evalúales el nuesu Comité de Preba, con un máximu de 10-12 muestres en cada sesión pa evitar la fatiga sensorial de los prebadores.

Si una partida de sidra superó tolos controles que garanticen el so orixe 100 % asturianu y la so calidá, tanto nel análisis físico-químicu en llaboratoriu acreitáu por ENAC como organolépticu pol nuesu Panel de Preba, concédese-y el derechu a utilizar la marca «SIDRA D’ASTURIES», el logotipu européu de los productos de calidá estremada y la precinta de garantía numberada del Conseyu Regulador. D’otra miente: si esa sidra nun superó los controles d’orixe y calidá del Conseyu Regulador, nun ye Sidra d’Asturies.

El uso de cookies mejorará su experiencia en este sitio web.