Sidra natural

La sidra natural pue presentase de dos formes: la tradicional, que nun ta filtriao y precisa que s’eche, y lo filtriao, tamién llamao «de mesa» o «de nueva expresión», que se filtria primero del embotelláu y nun fai falta echalo.

Organolépticamente, la sidra natural tradicional presenta un aspeutu mariellu payizo intenso de relativa tresparencia, espalme correutu y aguante. Arume franco al frutu de la so procedencia y llimpio. Tastu intenso y refrescante, soporte ácido y con tonos amarguxos mínimos, daqué astrinxencia y un tonu dulce mui llixero.

Echar ye dexar caer la sidra dende la botella al vasu. El so aniciu ta na «espicha» na que la sidra cai dende la pipa al vasu o la xarra; quierse d’esti mou llograr el mesmu efeutu cola botella que si tuviéramos prebándolo d’un tonel. Siguiendo esti ritual reafírmense les cualidaes de la sidra, despertando lo carbónico endóxeno y volatilizando parte del ácidu acético que la sidra tien.

Escanciando sidra ne'l chisqueru
Embotellado

A la hora de prebar una sidra natural tradicional recién echao hai que tener en cuenta un refileru d’aspeutos típicos. A la vista tien que se ver el «espalme», que ye’l comportamientu de la espluma superficial que se forma al echalo: esto ha sumise rápida y completamente, nun dexando cercos nin espluma. Tamién tien d’apreciase’l «aguante», que consiste na persistencia d’una emulsión de burbuyes que toma tola masa del llíquidu y que va sumiéndose amodo. Un aguante correutu esixe una persistencia más o menos prollongada. Finalmente, hai qu’observar el «pegue» o l’adhesión de la espluma a les parees del vasu en forma de partícules pequeñes y de mou consistente.

La sidra natural tien que s’almacenar nun llugar frescu. La temperatura de serviciu ye d’al rodiu de los 13 graos centígrados, y n’époques caluroses ye aconseyable tener la botella metida n’agua fresco, de pie, evitando’l contautu del corchu col agua.

La sidra natural filtriao tien un tonu mariellu allimonao con tonos verdes y doraos. Presencia de microburbuyes, llimpio y brillante. Arumes con notes frutales, vexetales y florales. Tastu fresco y llixero, tastu agrino y amargo con presencia de carbónico.

La sidra natural filtriao sírvese en copa a una temperatura ente 8 y 10 graos.

El uso de cookies mejorará su experiencia en este sitio web.