Controles sobre l’orixe

El Conseyu Regulador garantiza l’orixe 100 % asturianu de la mazana que se destina a facer sidra con denominación d’orixe per aciu de controles completos.

En primer llugar, la mazana namái puede venir de finques inscrites nel Rexistru d’Estayes del Conseyu Regulador. Cuando un productor pide la inscripción de les sos pumaraes los auditores del Conseyu inspeiciónenles, verificando’l cumplimientu de los requisitos del Pliegu de Condiciones tocántenes a variedaes, marcu de plantíu, fradadures y demás cuidaos obligatorios. Darréu les pumaraes siguen inspeicionándose de forma periódica, comprobando siempres’l so caltenimientu correutu.

Controles nel campu
Manzanes

Nel periodu de collecha los llagares tienen de comunicar al Conseyu Regulador con un mínimu de 24 hores d’antelación la receición de mazana con destín a DOP, según la rellación de provisores d’esi día. Con esta información los téunicos del Conseyu faen controles ensin avisu previu nes finques d’orixe de la mazana, comprobando qu’efeutivamente ta pañándose la fruta y qu’esto ta atropao nel interior del plantíu, llisto pal treslláu al llagar. Tamién se comprueba, nel momentu de la descarga de la mazana, que les variedaes son les que’l provisor tien llantaes nes sos finques.

Finalmente, n’acabando la campaña, tolos productores tienen qu’unviar al Conseyu Regulador una declaración de ventes desglosada por entregues, feches, llagares de destín y quilos apurríos. Los llagares, al empar, unvien al Conseyu una declaración de compres desglosada tamién por entregues, feches, productor y estaya d’orixe y quilos recibíos. Los téunicos del Conseyu Regulador comprueben toos estos datos pa verificar que coinciden esautamente.

Pal Conseyu Regulador ye prioritario dafechu garantizar l’orixe asturianu de la materia prima porque esa ye la nuesa razón de ser: la Sidra d’Asturies faise namái con mazana asturiano.

El uso de cookies mejorará su experiencia en este sitio web.