Quién somos

La DOP Sidra d’Asturies

El conceutu de Denominación d’Orixe fai referencia al usu de determinaos términos, xeneralmente nomes de llugares, ciudaes o rexones, pa designar un productu que ye pervaloráu polos consumidores en razón al so orixe, calidá y mou particular d’ellaboración.

Nel nuesu casu, la sidra fecho n’Asturies que sigue unos procesos tradicionales determinaos y que cumple unes condiciones específiques, ta protexío llegalmente pola Denominación d’Orixe «Sidra d’Asturies».

Non tola sidra que se fai n’Asturies abellúgase baxo esta Denominación: si la mazana nun ye d’Asturies, o les variedaes, los métodos utilizaos o los tipos de productu llograos nun dicen colo afitao nel Pliegu, esta sidra nun podrá acoyese a la Denominación d’Orixe. Pa que podamos falar de productos con Denominación d’Orixe tienen, poro, que coincidir tres elementos: l’orixe, el procesu d’ellaboración y la calidá.

El conxuntu de normes peles que se rixe una Denominación d’Orixe ta recoyíu nel Pliegu de Condiciones, documentu públicu nel que puen atopase tolos detalles sobre la demarcación de la zona de producción, les variedaes y práutiques de cultivu autorizaes, acordies colos aspeutos básicos de la ellaboración de la sidra.

Les funciones que cumple’l Conseyu Regulador puen resumise en tres estayes fundamentales:

  • Control y Certificación.
  • Defensa de la marca.
  • Promoción.
Instalaciones del Conseyu Regulador Sidra d'Asturies
Corchu col logotipu de la DOP Sidra d'Asturies

L’orixe xeográficu

La fastera de producción de mazana y ellaboración de los productos amparaos pola DOP «Sidra d’Asturies» correspuende a la totalidá de los conceyos del Principáu d’Asturies. Les pumaraes y los llagares tán distribuyíos per estremaes zones de la rexón amparada, tomando la totalidá del territoriu. La superficie dedicada al cultivu de la mazanal pa sidra inscrita nel Conseyu Regulador ye de 948 hectárees, correspondientes a 776 pumaraes de 352 productores.

La garantía d’orixe y calidá

Dos de les funciones propies de cualquier Conseyu Regulador son les de controlar la calidá y garantizar l’orixe de los productos acoyíos. Por ello, el Pliegu de la DOP «Sidra d’Asturies» tien en cuenta una serie de normes de cumplimientu obligáu en tola cadena de producción qu’entama na pumarada y peracaba cuando’l consumidor compra la nuesa sidra.

Pa garantizar l’orixe y la calidá del productu, el Conseyu Regulador fai dellos controles:

  • Sobre la pumarada: La inscripción de les pumaraes nel rexistru del Conseyu Regulador ye imprescindible pa que la mazana pueda destinase a la ellaboración de Sidra d’Asturies. A lo llargo del procesu d’inscripción los téunicos del Conseyu Regulador verifiquen la presencia esclusiva de les 76 variedaes autorizaes, la documentación d’autocontrol (cuadernu d’esplotación), según les práutiques afayadices de cultivu tocantes a marcos, densidaes, fradadura, caltenimientu, etc. Estes inspeiciones repítense con periodicidá pa verificar que se caltién el cumplimientu de los requisitos esixíos.
  • Sobre la collecha: Nos meses de collecha’l Conseyu Regulador afita un ampliu dispositivu de vixilancia y control. Les entregues de mazana tienen que se comunicar con, pelo menos, 24 hores d’antelación, faciendo los inspeutores controles d’abondo tanto nes estayes d’orixe como nos llagares de destín de la mazana. Contrólense los rendimientos tanto de producción de les estayes inscrites como de les prenses de los llagares, el rexistru afayadizu de la trazabilidá y la estraición de la sidra del duernu o dulce acordies colo que recueye la nuesa normativa.
  • Sobre los llagares: El Conseyu Regulador caltién un control permanente sobre los movimientos de sidra del duernu o dulce y sidra ente los llagares, asina como lo embotellao con destín a segunda formentadura. Toos y caún de los ellaboradores inscritos son oxetu d’auditoríes periódiques per parte de la Estaya de Certificación en caúna de les fases del procesu d’ellaboración, embotelláu y etiquetáu de Sidra d’Asturies
  • Sobre’l productu amparáu: Finalmente’l Conseyu Regulador, como garante de la calidá de los productos amparaos que salen al mercáu, toma muestres de la sidra primeramente calificao por caún de los llagares inscritos pal so análisis organolépticu y físico-químicu nun llaboratoriu acreitáu por ENAC.

Namás llueu d’estos controles completos ye posible garantizar l’orixe qu’acreíta’l sellu de garantía del Conseyu Regulador. Asina, toles botelles de Sidra d’Asturies tienen de llevar una precinta de garantía col logotipu del Conseyu, con un númberu individualizáu botella por botella.

Flor del pumar
Santalla d'Ozcos

Defensa de la marca

El Conseyu Regulador, como entidá dependiente de la Conseyería de Desendolcu Rural, Agroganadería y Pesca del Principáu d’Asturies, lleva alantre una defensa del interés públicu ya igualitariu de la sociedá asturiana y el mercáu de la nuesa tierra. La llei nacional ya internacional oblíganos a protexer los derechos de la comunidá nel so conxuntu penriba d’intereses privaos y parciales del sector. Ye deber d’esti Conseyu Regulador caltener la competencia equitativa ente los ellaboradores y caltenelos dientro de la llegalidá p’asegurar unes riegles de comerciu iguales pa toos.

El Conseyu Regulador vien cumpliendo cola so obligación: la proteición de los derechos xenerales, que ye la esencia d’un organismu dependiente de l’Alministración Pública, que pola so propia naturaleza tien de tar al serviciu del conxuntu de los ciudadanos. L’esfuerciu emplegáu nesti proyeutu de tolos asturianos nun pue tar supeditáu a los intereses económicos particulares, sinón que tien de ser un patrimoniu social que podamos dexar a les xeneraciones venideres.

Nestos últimos años fueron munches les defenses que se fixeron énte la Oficina Española de Patentes y Marques frente a intentos de rexistru per parte d’empreses privaes de marques d’usu esclusivu pola DOP Sidra d’Asturies acordies cola Llei 17/2001, de 7 d’avientu. Toes elles ganóles el Conseyu Regulador de la DOP Sidra d’Asturies. Nesti enllaz pues ver el llistáu completu.

El uso de cookies mejorará su experiencia en este sitio web.