Fastera xeográfica

La fastera de producción de mazana y ellaboración de los productos acoyíos pola Denominación d’Orixe Protexida Sidra d’Asturies correspuende a la totalidá de los conceyos del Principáu d’Asturies. Nun pue usase, poro, aquella mazana que venga de fuera de la nuesa comunidá autónoma.

Asturies asítiase al noroeste de la península ibérica, ente los 4°30’ y los 7°11’ de llonxitú oeste y los 42°53’ y 43°40’ de llatitú norte, na aguada septentrional del Cordal Cantábricu, ocupando un corredor estrechu de 15 a 80 kilómetros d’anchu y 200 de llargu. Xebrada por La Ría de Tinamayor de Cantabria y por El Río Eo de Galicia, al este y al oeste respeutivamente. El mar Cantábricu lléndala al norte y el Cordal Cantábricu, al sur, dixébrala de la comunidá autónoma de Castiella y Lleón. Siguiendo la direición llonxitudinal pueden estremase n’Asturies cuatro unidaes: los altos cumales y valles del Cordal Cantábricu, los montes medios fendíos por valles tresversales, la cuenca d’Uviéu y la franxa costera.

Sariego
Pumarada en branu

Les pumaraes y los llagares atópense distribuyíos per distintes fasteres de la rexón acoyida, tomando la totalidá del territoriu. Hai que destacar que, magar la superficie xeográfica delimitada ye de 10.560 km2, nun ha escaecese qu’Asturies ye una de les rexones con más montes d’Europa, lo que llenda sobre manera la superficie agraria útil pa esti tipu de cultivu, que s’atopa allugáu en valles pequeños y lladeres de tol territoriu citáu.

Como asocede cola distribución de les pumaraes, los llagares históricamente apaecen nel territoriu en forma de instalaciones pequeñes nes esplotaciones agraries que facíen sidra pal autoconsumu familiar. Col tiempu esta práutica foi dexándose y güei los llagares foron concentrándose en llugares cercanos a infraestructures y con servicios más afayadizos pa desendolcar l’actividá industrial.

En cuantes a les pumaraes, nos últimos años ta produciéndose un desendolcu importante, dientro de les llimitaciones de superficie, de nueves pumaraes y sustitución d’otres, qu’ameyorando les práutiques culturales y adecuación varietal faen posible que se llogren producciones de mazana pa sidra de calidá óptima pal so tresformamientu nes industries receptores d’esta materia prima.

El uso de cookies mejorará su experiencia en este sitio web.