El ciclu vital de la mazanal
Tradicionalmente les mazanales o pumares n’Asturies cultívense de forma estensiva, con un aprovechamientu mestu de mazana pa sidra y prau. Pola mor del fondu minifundismu de les esplotaciones asturianes, esta combinación d’actividá ganadera col llogru de mazana destinao a facer sidra dexa dibuxar bona parte de les carauterístiques socioeconómiques del rodiu rural asturianu, llogrando asina rentes complementaries dientro de la esplotación agrícola familiar, que per otra parte fai posible evitar en daqué manera l’éxodu rural, xenerando una actividá que curie’l mediu y afite población.
En primavera, dende metá d’abril, empecipia’l florecimientu de les variedaes de mazanal asturianes acoyíes a la Denominación d’Orixe Protexida «Sidra d’Asturies». Los primeros brotos de les cañes anuncien lo que dempués va ser el florecimientu espectacular de los pumares. Delles variedaes van tar yá en plenu floriar a lo cabero d’abril, allargándose esti periodu hasta lo postrero de mayu.
Ye nesti periodu primaveral, como tamién al principiu del branu, cuando se produz el espoxigamientu vexetativu de la mazanal. Nesti tiempu faise l’aclariáu de flores y frutos, pa garantizar d’esti mou la calidá y tamién una regulación d’aquelles variedaes que tienden a tener una alternancia pergrande de colleches (vecería).
Asturies cuenta con unes condiciones inmeyorables, dende’l puntu de vista natural, pa poder disponer d’unes pumaraes pa sidra de primer categoría. Les xelaes y el tiempu inestable pueden poner en peligru, sicasí, l’entamu del frutiamientu nos meses de la primavera.
Les mazanes espoxiguen pel branu y completen la so maduración na seronda. A partir de finales de setiembre y hasta principios d’avientu páñase la mazana, dependiendo del periodu de maduramientu de cada variedá y de les condiciones climatolóxiques. La pañada faise nun estáu de maduración próximu al óptimu, lo que dexa acollechar el frutu con abonda firmeza, menguando los daños que remanezan de la so manipulación na pañadura, almacenamientu y tresporte.
Finalmente, pel iviernu faise una frada añal y fertilícense los árboles, dando los nutrientes necesarios pa cubrir les sos necesidaes.
Menes de cultivu
El cultivu tradicional ye, como yá diximos, un aprovechamientu mestu de mazanal pa sidra y prau. Empléguense patrones de gran puxu (francu o de grana) que dan llugar a árboles mui vieyos, de gran espoxigue, rústicos y poco precoces na entrada en producción. Utilízase marcu real, rectangular o tresbolillo, con un sistema de formación llibre a tou aire.
El cultivu n’exa ye un cultivu semiintensivu col emplegu preferente de portainxertos de puxu mediu (seminanos), tipu MM106, MM111, M7. El sistema de formación ye’l d’exa nes sos múltiples variantes, el marcu de plantíu ye rectangular y la distribución de les variedaes faise por fileres. Esti tipu de sistema de formación fai posible una entrada rápida en producción y facilita los llabores de frada, caltenimientu y pañadura de la mazana.
En tolos casos fadráse un caltenimientu añal de la pumarada pa favorecer el so desendolque amañosu y llograr unes producciones de calidá, amenorgando la incidencia de la vecería. Fadráse’l caltenimientu de la llinia de plantíu pelo menos los cuatro primeros años, tando ensin yerba per aciu de téuniques de manexu afayadizu. Les cais van caltenese con yerba dende’l segundu añu per mediu de siega o roza, faciéndose pelo menos dos vegaes al añu.
