Sidra natural esplumoso
Trátase xeneralmente d’una sidra seco, tipu brut. Color pálido amarellao con rellumos doraos, burbuya fino y constante d’evolución lenta que forma corona marcada. Arumes de calter frutal n’harmonía con notes tostaes que suxeren madera. El so tastu ye’l d’un productu secu, con acidez llixero y baxu n’alcohol, con frescor que perdura.
La sidra natural esplumoso llógrase, como diximos, per aciu d’una segunda formentadura nun recipiente zarráu. D’esta miente’l gas carbónico presente na sidra natural esplumoso con denominación d’orixe ye siempre endóxeno, nunca amestao. En función del recipiente nel que se completa esta segunda formentadura, tenemos dos métodos d’ellaboración: el métodu tradicional y el métodu Charmat.
Nel métodu tradicional o champenoise partimos de la sidra base clarificao, a lo que se-y amiesta’l llicor de tiraxe (azucre y lleldu) enantes de proceder al embotelláu. La sidra fai la segunda formentadura en rimes (xaules con capacidá pa unes 500 botelles) dellos meses, pasándose dempués a completar l’avieyamientu en pupitres. Equí les botelles van voltiándose y entornándose hasta quedar en posición cuasi vertical, cola borra que se produz na formentadura acumulao nel bocal. Per último faise’l «degüelle», procesu que consiste en conxelar el bocal de la botella cola borra y abrila darréu. La propia presión del interior del recipiente echa’l xelu xunto a una cantidá pequeña de llíquidu, que se recupera amestando’l llicor d’espedición.
Pa facer sidra natural esplumoso col métodu Charmat o granvas tamién partimos d’una sidra base clarificao, que se trasiega a un depósitu de presión que contién tamién el llicor de tiraxe. La segunda formentadura tien llugar nesi depósitu, y n’acabando esto fíltriase y embotéllase.
Con cualquiera de los dos métodos llógrase un productu frescu y natural, perfeutu p’acompangar con pescáu, mariscu, aperitivos y quesos. La sidra natural esplumoso sírvese en copa de tulipa y la so temperatura tará ente 6 y 8 graos centígrados.
